26 juin 2019 par Pichoulit

 
L'wékenne passé, ch'éteot l' fiête de l' musique, j' suppose que tertous i s'in a rindu queompte, on n' d'a parlé tout plein dins les gazetttes et dins l' poste.

Mais ch'éteot avec, l' wékenne « portes ouvertes » dins les cinses de tout l' Wallonie.

71 cinses i-eont ouvert leus portes et 9 dins no belle wallonie picarte. Mi, quand on m'a dit cha, j'ai busié qu'on risqueot d'ortrouver des vaques, des qu'vieaux, des pourcheaux, des glaines et tous les biêtes de l 'cinse dins les rues, vu qu'on alleot ouvert les battants des portes cochères des cinses dins tous les villaches.

Mais m' feimme elle m'a espliqué qu'eine « porte ouverte », ch'éteot pos cha du tout mais eine occasieon d' s'intéresser à tout quoi ç' qu'on f'seot dins les cinses de l' régieon.

Et comme t' neom, ch'est Pichoulit qu'elle m'a dit, te deos aller vir eine cinse dins l' nature et écrire ein artique su les plantes de t'n'espèce. J'ai ainsin vu qu' les cinses i z'aveotent des neoms comme les restaurants : « Ferme Delgueule, ferme du clothier, l' cinse du mayeur, cinse du hameau, cinse de l' pature et j'in passe.

Du queop on s'a mis in route et pou ête dins l'actualité, on a queusi eine cinse qui-a ein neom dins l'air du temps : l' cinse des coqueliqueots.

In visitant ainsin des cinses d'aujourd'hui, ch'est ein p'tit air d' nostalgie qui m'a invahi. Des raminvrances de jeonesse i seont orvénus à l' surface quand on alleot caire l' lait tout fraique dins ein cruche juste après l' traite des vaques, l'odeur du bure sortant de l' barate ou bin les oués tout quéauds qu'eine glaine in liberté elle aveot pondu.

Ainsin dins les cinses d'aujourd'hui, ch'est ein vrai ortour à l' nature que les jeones cinsiers (et même des pus vieux) i nous propos'tent de vife avec eusses. Et i-est grand temps d'ortrouver l' bonheur de l' tierre qu'on cultife à p'tite étchelle sans treop d'ingrais et avec des cultures d' plantes qui n' seont pus hybrites, avec alfeos des qu'vieaux d' trait, des camps d' maraichaches avec l'ortour du maréchau ferrant ou acore l'él'vache des gates, des bédeaux, ou des glaines qui queurtent dins les patures su les tas d' feumier, des penn'tierres dins ein banse.....tout cha pour ordeonner à l' nature ses lettes d' noblesse dins des cinses à talle humaine.

Seur que tout i n'est pos rose et qu' tous les cinses i n' seont pos parelles mais i d'a d'pus in puque qui-eont ormis l' nature à l'orte du jour ; et au jour d'asteur, quand no planète elle perd el' tiête, des cinses qui-eont compris l' défi de d'main i feaut les incourager.

J' deos pourtant bin avouer que j' n'ai pos bramint visité l' cinse vu qu'à peine là, j'ai rincontré eine masse d'amisses et qu'on n' d'a bu eine paire mais...de l' bière bio, du vin bio et du vrai fromache, l' ceu des gates de l' cinse, et cha avec ch'est important : printe l' temps d' parler avec tes amisses. Et tout cha sans queurir dins les rayons des super marchés pou acater du fromache surimballé, du pain qui vient d' Polone et du lait dins des briques que tes infants i n'sav'tent même pu qu' ch'est eine vaque qui l'a produit ou acore des penn'tierre dins ein sac in plastique, des oués presque carrés pondus par des poules intassées in batt'rie qui feaut avoir eine master pou décoder les chiffres du calibrache.

Tandis que les oués du cinsier (infin d' ses poules), l' lait, l' bure, l'yougourt et l' fromache d' ses vaques, d' ses gates cha au moins t'es seur de quoi ç' que t' minches.

J'ai vraimint passé ein beon moumint et j'ai même vu des pichoulits...

Bin vite l'an prochain pou orvife eine journée à l' cinse.

Pichoulit