28 août 2019 par Pichoulit

 
Au cas où cha t'areot écappé, ch'est béteôt l'rintrée. Pou n'pos l'vir, i feaut avoir des riches cachifes. T'es acore in vacances que t'as d'jà dins les grantes surfaces, eine volée d'cartapes et d'cahiers.

Ceulle rintrée, elle a cha d'particulier, ch'est qu'i-a deux sortes d' « rintrants » : les profs et l'z'élèfes.

Les profs d'abord, i d'a d'jà eine banse, fort conscieincieux qui seont d'jà rintrés d'pus ein moumint, histoire d'ête fin prêts et je n'te parle pos des chefs d'école qui-eont d'jà mau à leu tiête à forche d'essayer d'comprinte les circulaires ministérielles de rintrée; i-a toudis eine séquoi qui canche, et comme ichi i va avoir ein nouvieau minisse, seûr qu'i (ou elle) voudra marquer s'territoire avec ein cang'mint ou l'eaute....

Et, i-a aussi les tout jeones profs qui veont avoir l' sanche d'avoir leu prumière classe, et j' leu souhaite plein d' bonheur dins leu nouvieau métier. J'oblie pos l'z'eautes (et i seont fin nombreux) qui seont fin contints d'ortrouver leu classe et infin, eine dernière catégorie, avec , comme dins tous les métiers, les ceusses qui seont mates avant de qu'mincher.

Et puis i-a l'z'élèfes, et si i d'a eine banse qui seont fin bénaisses d'ortrouver leus copains pou raqueonter leus vacances, i d'a d'z'eautes que cha s'ra leu prumière rintrée.

Prumière rintrée à l' maternelle pou les p'tits proutes de deux ans et d'mi (capieau à leus n'institutrices pou l'patieinche et l'amour qu'i veont deonner à tour de bras tout au leong d'l'ainnée,).

Prumière rintrée in prumière ainnée pou les p'tits rambiles qui veont apprinte à lire et à queompter, ch'est eine grante avinture qui qu'minche (capieau avec à les ceusses qui veont ouvère les portes du savoir, on s'imagine pos l' trésor d'imaginatieon qu'i feaut pou les prumiers apprintissaches).

Prumière rintrée avec dins l' secondaire et cha ch'est d'jà ein pus grand stress : eine banse de profs et eine masse d' nouvieaux copains qu'i va falloir apprivoiser sans parler des choix qu'i va falloir faire in cours de route : ein vrai labyrinthe dins l'z'optieons...

Rintrée infin à l'unif pou d'z'eautes et là ch'est vraimint ein grand saut dins l'inconnu mais surtout ch'est d'jà l' vie adulte qui s' profile même si l' vie estudiantine elle est ein passache particulier qui n'a pos qu'des côtés tristounets.

Adeon à tous ceux-là qu'ch'est l' prumière rintrée, à tous l'z'eautes pou qui l' rintrée cha reste quand même ein moumint particulier, à tous les profs, les fraiques vélés comme les vieux d' la vieille, on souhaite eine ainnée riche d' progrès, d' succès et d' satisfactieons in obliant pos l' sanche qu'on a dins no pays d' pouvoir aller à l'école, i d'a partout dins l' meonte qui paireottent bin tcher pou pouvoir avoir ç' dreot-là.

Pichoulit