25 septembre 2019 par Catoire

I-a eine paire de s'maines, in ravisant l' programme télé de l' soirée, m' feimme cait d'su ein film d' mil nué chint sieptante : « Dernier domicile connu ».

Nous ovlà adeon imbarqués pour ein « ortour vers l' temps passé ». In beonne companie, éné, avec Marlène Jobert toute jeone et m' copain Lino Ventura dins l' forche d' l'âche.

Eç' film i raqueonteot l'histoire d'ein commissaire et d'eine jeone auxiliaire de police qui cacheot'tent ein témoin capital qu'on aveot pierdu d' vue. On n' saveot qu'eine séquoi sur li, s' dernière adresse connue : ein jeu d' piste estra, pos d' violince pour rien comme asteur, mais ein rythme sout'nu et du « suspinse ».

Mais tout in ravisant l' film, je m' diseos que l' cinéma de ç' temps-là, ch'teot vraimint du « cousu-main » : les policiers, ch'est l' cas de l' dire, i z'éteot'tent habillés comme i feaut, éné. Lino par eximpe : eine vraie gravure de mode : ein bieau costume deux pièches, eine quémisse orpassée, eine cravate, ein capieau mou et ein imper gris, Marlène elle éteot vraimint chic avec ein bieau pull-over, s' mini-jupe et ses collants foncés.

Mais, vous avez d'jà ravisé les policiers au cinéma asteur ? I z'eont dormi tout habillés, hasard ! Des vrais débloqu'teux ! Et n' parleons pos de l' manière d'ouvrer : Lino i saveot faire s'n' ouvrache in d'meurant poli avec les gins et i conduiseot s' « quate chint quate » in suivant l' code de la route.

Aujourd'hui cha gueule des greos meots à l'occasieon et cha roule à gauche comme des écappés d'Ingleterre sans s'occuper d' rien d'eaute que d'accrocher leu bleusse lampe su l' toit d' leu carrette !

In orbusiant bin à ç' que j'ai ravisé à l' télévisieon ç' soir-là, j' me dis qu'i-a quand même eine séquoi qui n'a pos cangé dins les films policiers d'aujord'hui. Les gansters et les agoneus i roul'tent toudis dins des voitures de lusque.

Mais adeon ch'est normal, ces gins-là ch'est comme les minisses, leu n' auteo ch'est pos eusses qui les pai'tent !

Catoire