29 janvier 2020 par Tiête de lard

 El' GSM ! Ch'est vrai que ch't'eine belle invintieon. ! N'importe dù c'qu'i-est, el' ceu qui d'a ein, i peut app'ler s'feimme, s'maîtresse ou ein comarate. Quand i-est coinché dins ein imbouteillache ou dins l'train, au matin ou au soir, i peut prév'nir es'n'ouvrache ou s'feimme. Ch'est pratique in cas d'accidint : on prévient tout l'suite pour avoir les s'cours. Avant cha, l'méd'cin, i d'veot, à chaqu' queop ortourner à s'maseon et d'mander à s'feimme dùsqu'i d'veot aller faire es' visite d'après; asteur, ch'est fin pratique : elle li dit, d'ein queop, qui qu'ch'est qu'i deot aller visiter ; el' malate i-est soigné tout l'suite et l'méd'cin, i f'ra acor pus d' visites sur es' journée ! Ch'est seûr qu'i va gagner bin pus d' liards.

Ah, pour cha, el' GSM, ch'est vraimint eine belle invintieon !

Quand t'es dins l'train, dins ein magasin, dins eine réceptieon, cha seonne à tous les moumints et pour n'importe quoi. Et asteur, on sait personnaliser l'sonn'rie. J'ai ein comarate socialisse qui, comme appel, a mis l' « Internationale » . J'conneos ein curé qui-a mis l' « Ave Maria ». J'in conneos ein du Cabaret Walleon qui fait canter « Les Tournaisiens sont là ». I paraît que l'sonn'rie du GSM à Stéphane Moreau, ch'téot l'cancheon des Charlots : « Si te n'veux pos payer d'impôts ».

Adeonc, el GSM, vraimint, ch't ein' belle invintieon...In puque, cha seonne n'importe dù et n'importe quand.

Mais ch'est bin imbêtant : « Allo chérie, j'sus dins l'rayeon des boisseons : el' casier d'bières, i-est à 11,25€ au lieu d'11,30€. Dis-me si-i feaut in printe ein !»...Quand t'es dins l' train, i d'a ein qui parle pou tout l' wagueon : te sais ç'qu'i veont minger pou souper ; te sais que s' feimme i-a disputé avec es' belle mère : te sais tout de l'vie privée des gins.

I-a des seots qui obli'tent d'l'éteinte in certaines circonstances. L'eaute jour, j'éteos à n'ein intierr'mint : cha a seonné au moins trois feos !... Ch'teot bin malin !

A l'ouvrache, i d'a qui décroch'tent pus vite leu GSM que l' télépheone du bureau.

Dins l'z'écoles, paraît que ch't'épouvantape ! les jeones n'arrêtent pos d'jeuer avec et d'inveyer des messaches dins ein langache espécial, qui-est fait pour cha : queulle ortographe !!!

El' GSM , ch'est vraimint eine belle invintieon !.... Te sais jointe les gins n'importe dû et n'importe quand ! On sait t'jointe n'importe dù et n'importe quand ! Ch'est jusse pour cha qu'mi, i n' m'in feaut pos ! Au moins ainsin, j' sus acor seûr ed' boire mes pintes à m'n'aisse, sans pus que m'feimme elle me dérinche à tous les queops...

Tiête de lard