5 février 2020 par Catoupi

Mais qu' ch'est dur à m'n'âche ! Si j' vas dormir à eine heure du matin, i m' feaut eine sémaine pou m'ormette.

Ténez : On vient à peine d' sortir d'ein greos wékenne d' Cabaret Walleon, verdi au soir et saim'di au soir à la Halle aux Draps, et du diminche après-deîner à Ere. J'aime autant d' vous dire que du lundi, j'éteos mate. Et du mardi avec. Mais i n'a rien à faire, i feaut s'ormette in route, vu qu' ch'est l' périote des carnavals qui va c'mincher.

D'abord, du saim'di 22 féverrier, j' vas aller au carnaval de Kain, comme tous l'z'ans. I-a là eine fin beonne imbiance, ch'est ein carnaval familial, avec ein cortèche dusqu'i-a des fanfares. Ch'est gai, les fanfares ! Après l' brûlache du Roi, les infants i z'orchoiftent eine couque et du cacao, puis i z'orwettent ein spectaque, tout cha gratuit'mint, sivouplét !

Pindant ç' temps-là, les parints i-in boiftent eine, et i-a ein groupe qui jeue pour eusses. Du soir, ein souper et ein bal costumé, toudis in famile.

Du mardi d'après (l' 25), ch'est l' Mardi-Gras, et l' prumière sortie des carnavaleux à Tournai. Ch'est pos cor el' grand Carnaval, mais on s'amusse bin tout l' même. Et on va infin savoir qui ch'est l'z'albrans qui veont ête roi et reine du carnaval ç't'ainnée-chi. Ch'est souvint des dreôles de loustics, qui z'aim'tent bin d' faire el' mariolle.

Et du lind'main, l'mercredi, j' vas aller mette eine planchette avé n' candelle su l'Esquéaut, comme j' fais d'puis au moins vingt ans au mercredi des Cendres. Ch'est ein bieau momint plein d' poésie, qui rappelle des vielles traditieons d' nos incêtres. On appelle cha aussi les cand'liers d'acoulin, et ch'est pou saluer l'ortour des jours ein p'tit queop pus leongs.

Et ch'est l' momint d' conclure in orlisant l' titre d' l'artique : Pos l' temps d's'ormette !

Catoupi

Les prochaines prestations du Cabaret Wallon : samedi 7 mars à 17h au Foyer St-Brice (au profit du Saulchoir), puis les cabarets de mars (nouveau programme) les 27 et 28 mars à 20h (réservés aux hommes), le dimanche 29 mars à 16h (tout public). Ces 3 séances ont lieu à la Halle aux Draps. Enfin, même programme le dimanche 5 avril à 16h à Rumes.