A la demande générale, et avec l'accord de la famille, voici la chanson d'Albert Coens, "L’lapin du lundi perdu"

J’aveos pourtant d’mandé à Dieu
De n’pos m’fair’ morir à p’tit feu :
Feaut croir’qu’i-a eaut' cosse à pinser,
Pasque j’vas béteôt trépasser !
Depuis deux heur’s que j’sus t’ichi,
Tertous i s’acharn’nt après mi :
J’ai ramassé chint queops de coutieau
Dins m’vint’, mes gamp's et l’bas de m’deos !
Et pus j’ai vu ein’viell’ sorcière
Qu’ell’ plongeot m’carcass’ toute intière
Dins eine espèce de grand caudreon
Qu’ell’ fait cauffer comme ein démeon !
Déjà,j’intinds les cris d’sauvache
D’ceux qui, sur mi, s’mettreont in rache
J’vas êt’ mingé……et on m’a eu :
J’sus lapin du lundi perdu

J’ai toudis vécu honnêt’mint,
J’veos pos pourquoi féaut qu’in ç’momint
Ch’est mi qui sert de sacrifice
A ces galfards, à ces jocrisses !
J’sus v’nu au meonte à Ram’gnies-Chin
J’aveos pour père ein gros Flamind
Qui m’répéteot : « M’Pétit Rambile »
« Ch’est ta l’pus braf’ de tout l’famille »
In amour, quand j’sus dev’nu grand,
J’ai toudis fait m’n’ouvrache in temps
Je l’jur ! J’n’ai jamais raté m’queop
J’ai ‘té papa quarant’huit feos !
Aussi juger de m’grand chagrin,
Quand j’pins’ que j’laich’ des orphelins !
Avant d’morir, j’ai l’cœur findu :
J’sus lapin du lundi perdu !

Quand,dins m’camuche,on a v’nu m’querre
Pou m’conduir’ jusqu’à l’plach’Saint-Pierre,
Je n’saveos pos ç’qui m’attindeot,
J’pinseos mêm’ vir ein’séquoi d’bieau…
Au lieu d’cha , on m’a assomé,
Ecorché, saigné,dépieauté,
Et m’fourrur’, sans qu’on me l’demante,
On l’a vindu , trois francs chinquante ! ………
Inv’loppé dins du papier gris,
Tout nu,j’sus t’arrivé ichi :
On m’a pindu à ceull’ferniète,
In pleine gelé’, pou ête bin raite,
Et j’n’aveos qu’ein’consolatieon :
Les passants f’sant ceull’réflexieon :
« Modieu,r’wettiez…qu’i-est bin dodu
« Ch’t’ein vrai lapin d’lundi perdu ! »

Asteur que j’sus dins ceull’cass’role
Cha n’véaut pus l’pein’que j’me désole :
Dins deux minut’s,cha s’ra fini,
J’s’rai avalé et tout s’ra dit….
Aussi,j’vas moutrer qu’j’ai d’l’étoffe
Et j’dirai, in vrai philosophe :
« Ch’t’ein grand honneur, pou ein lapin
« Qu’d’êt’ mingé par des Tournaisiens »
Mingez, buvez, riez, cantez,
Ch’est jour de fiête aux Cheonq Clotiers !
Surtout,n’vous in fait’s pos pour mi :
Tout ç’que j’souhait’,ch’est d’êt’ bin cuit
Et qu’à ç’soir,tertous ,in équeo,
Insann’ vous répétiez ces meots
Que j’dis au momint d’ête foutu
« Vif Tournai et s’lundi perdu ! »