4 septembre 2008 par L’Picard d’ichi Magazine

Eh, bé cha i-est, nous ov’là orpartis pou eine nouvelle saiseon et…cha n’s’ra pos eine sinécure : quate décindants et ein barragiste, eh, bé, ch’est tout l’divsieon qui va ête in transe pindant tout l’saiseon.

Tertous i sait que l’deuxième saison ch’est l’pus dur’te alors, on va s’accrocher au mitant d’tous les clubs flaminds et d’eine paire deWalleons qui restent. Si on perd l’Union Saint Gilloisse, on récupère l’Olympic et l’fotbal club de Lièche.  On peut cor s’apprêter à faire bin des kilomètes…..

In parlant d’rester, v’là qu’mossieu Pister i-est d’allé à Mons, ch’est dammache mais on peut quand même l’ormercier pou tout l’traval qui-a ichi fait. L’ov’là même asteur intraineu in chef dins l’Cité du Doudou, tous nos vœux i seont avé li pou qu’i réussisse…
L’ceu qui l’rimplache i conneot s’métier aussi et on li souhaite l’bienv’nue.
Et même si i-est flamind, on peut dire qu’neom i-est ein p’tit queop Picard, n’t’étonne pos si i d’a ein qui li crie d’timps in timps « Allez Biloute », i n’pourra pos écapper au jeu d’meots.
Et pus i-a core eine paire d’nouvieaux joueux qui seont arrivés, à eusses avec on souhaite l’bienv’nue et on espère qui veont définte no couleur avé tout l’ardeur des Tournaisiens.

D’ein eaute côté, on s’réjouira avec de l’montée d’Beloeil in promotieon , ch’est pos tous les jours qu’on peut fiêter ainsin ein club visin. Ainsin, le Hainaut occidental (pardeon, l’Wallonie picarte) elle est r’présintée à tous l’z’éch’leons du championnat : Mouscron, nous z’eautes, Pierwez et Beloeil.

In parlant d’z’éch’leons, j’ai lu eine séchu qu’on alleot scinder l’fotballe inter les régieons à partir de l’divisieon treos. In v’là eine eaute asteur, hasard que De Decker (qui f’seot moins d’vagues quand i s’occupeot d’judo..acore que…) i-a mis s’nez là d’dins avec.
Après cha, nous z’eautes on devra p’tête jeuer l’championnat d’France.
Dis hardimint qui feaut alfeos de l’beonne volonté pou s’ortouver dins s’bazar. Ravisse l’histoire de Geel l’ainnée passée, ravisse l’désignatieon d’Vander Eycken (tins on n’in parle pus…bé i-a pos d’matches internationaux adeon, i-est seur qui n’perd pos pindant s’temps là), ravisse l’bazar avé Fellaini et Kompagny  aux jeux olympiques, l’union belche elle ara béteôt s’sièche à Echternach. tell’mint qu’elle fait des pas in avant et in arrière dins l’même temps.
Mais dins ceulle grisalle, i feaut quand même tirer ein grand queop d’capieau à l’équipe des Diablotins , faire tout quoi c’qu’elle a fait dins des conditieons pos les meilleures, i falleot l’faire. Bravo aussi à Mossieu de Sart, intraîneu compétent, sympathique…cha nous cange d’l’intraineu des A mais tertous i n’veut pos l’comprinte.

Allez, v’là ainsin eine paire de réflexieons d’début d’championnat, mais on n’obliera pos pou autant d’crier acore bin fort « Allez les sang et or »

L’Picard d’ichi

< Précédent		Suivant >