23 septembre 2008 par   L’Picard d’chi  

J’suppose que comme mi t’as li dins l’gazette et t’as vu à No télé qu’nos bourguemettes i s’aveotent tertous réunis à Mouscron pou parler d’eine même veox dins l’concert politique d’asteur qui soit dit in passant ch’est eine belle cacophonie.

Ch’est ein tout p’tit peu du récauffé, te m’diras mais cha reste quand même d’actualité…

Ainsin donc, mononque Alfred i-a là fait eine sorte d’fiête de famile qu’on aveot ein p’tit queop l’impressioen qu’ch’éteot comme ein goûter d’anniversaire. I aveot là des croissants (que ch’est d’jà moins tchers qu’ein guelton, ch’est d’jà ein beon point,….. i feaut dire que Daerden, li i s’in s’reot pos continté mais i n’est pos d’par ichi, acore hureux…), eine beonne jatte de café et p’tête bin eaute cosse mais on n’l’a pos vu

Mais comme à tous l’z’invitatieons, tertous i n’a pos v ‘nu et j’ai eu bieau lire l’gazette ou raviser à No télé, j’n’ai bin pu idintifier les absents. Pétête que ch’est des ceusses qui z’aveotent dit à leu feimme qui z’éteotent là et qu’i valeot mieux pos savoir qui z’éteotent ailleurs, va t’in savoir. Je m’déminte aussi si, comme à l’école i z’aveotent r’mis ein certificat médical ou bin ein meot des parints pou excuser leu n’absence auprès du maîte Rudy qui éteot l’grand maîte de ceulle réunieon.

Et v’là qui z’eont tertous parlé de l’Wallonie Pïcarte, pasqu’asteur ch’est fini d’dire eaute cosse ou bin on va ête puni qui a dit l’maîte Rudy.

N’impêche mi, j’ai l’nostalgie du temps qu’on diseot l’Tournaisis et qu’on veyeot cha tout partout su les panneaux touristiques. Le Hainaut occidental, ch’est fini aussi pasqu’i falleot ête deux queops espert in géographie pou savoir dusque ch’est, le Hainaut d’abord, l’Occidint après.

Mais on a été tout ein moumint avant d’savoir si on direot Picardie wallonne (cha voudeot dire qu’on f’reot partie de l’grante régieon picarte in étant dins l’morcieau wallon) ou bin Wallonie picarte (cha veut dire qu’on est dins l’grante régieon walleonne et qu’on est l’morcieau in Picardie), cha a l’air biête mais ch’est pos innochint. V’là donc qu’on a opté pou s’identifier comme walleons d’abord, espérons qu’nos ponces i s’raminvreont que l’Wallonie elle ne s’arrête pos à Mons comme ch’est souvint l’cas . Ch’est pos innochint non pus d’vir qu’on met l’majuscule à Wallonie (ch’est ein neom qu’on dit in grammaire) et eine minuscule à picarte (ch’est ein adjectif) mais au-d’là de l’grammaire, ch’est aussi ein symbole. Mi j’areos préféré l’inverse mais qui soite.

In attindant, comme dins les beonnes classes d’écoles, on va faire eine tournée des goûters d’anniversaire et nos bourguemettes i veont s’ervoir qui z’eont dit pou eine eaute pétit déjeuner. Dù ? Cha ch’est l’surprisse.

Pétête chez Tonton Jean-Luc même si on risque d’manquer d’chuque vu que s’sucrerie elle a serré ou alors chez l’bourguemette d’Brugelette, s’sucrerie elle a serré avec mais vu qui s’intind bin avé s’grand concitoyen ……pétête qui va inviter tertous à Paradisio….I finireont l’journée à l’grante plaine de jeu, on pourreot app’ler cha…l’jeu politique.

L’Picard d’chi

< Précédent		Suivant >