6 janvier 2009 par Clovis  

Tous l’z ans, à ceulle période, je m’ raminvre les jours de l’an de m’jeonesse.

De ç’temps-là, on n’ connisseot pos les joies du réveillon, adeon on se l’veot d’ beonne heure pour dire « Beonne ainnée, beonne santé » à ses parints. Alfeos, on leu réciteot ein bieau complimint qu’on aveot appris à l’école.

Après on s’metteot in route. On alleot in prumier mette in beon an à les grands-parints.

Là, on r’commincheot l’même cérémonie. Et avant d’sortir, on orcheveot eine belle pièche de chint francs avé les tiêtes des rois. Après, on fileot chez Matante Sidonie, eine vielle harpielle qui-aveot de l’moustache. Mais i falleot li donner eine baisse sineon on n’orcheveot pos l’pièche tant espérée.

Après, ch’teot l’tour des mononques plus jeones. Su l’quémin du r’tour, on s’arrêteot chez  Clotaire, ein cousin du côté de m’ mopère. Et i n’éteot pos questieon d’l’oblier sineon i nous areot eu su s’ lanque pour l’restant d’ l’ainnée.

Quand on rintreot de ceulle tournée des grands ducs, m’mopère i aveot  eine demi-preone à causse des gouttes qu’i-aveot bu et nous-éautes, on aveot l’ cœur tout ortourné des tas d’galettes qu’on aveot mingé. On areot bin voulu warder eine partie d’nos  « bénéfices de guerre », mais on d’veot rinte toutes les pièches et les billets pou mette su no livret « pour pus tard ».

On éteot obéissants, mai 68 i-éteot acor à invinter.

L’temps i-a passé, Sidonie, Clotaire et les grands-parints i-eont disparu. Asteur, qu’on est parints, on n’veot pus perseonne l’jour de l’An. L’ trente et un à minuit on orcheot ein « SMS »de nos infants garni d’ beons vœux et d’bisous. I s’amus’tent inter jeones et i-z-eont raiseon mais i pins’tent quand même à nous, ch’est beon sine...

L’temps passé i est oute. I n’ feaut pos l’orgretter. Les usaches i canch’tent, ch’est moins cérémonieux mais ch’est plus direct et souvint pus sincère.

Ainsin, sans queurir tout partout et sans risquer d’attraper eine guinse, j’peux vous souhaiter à tertous eine beonne ainnée et eine beonne santé. Si cha n’est pos l’progrès, qu’est-ce que ch’est adeon ?

Clovis