3 février 2009 par Clovis  

Bonjour mes gins.

Asteur, vous l’avez li dans vo gazette préférée ou bin vous l’avez vu à No Télé, no Cabaret i-a orchu  l’Picard 2008 dins s’catégorie. Vous m’direz : ein Picard pou des vrais picards comme nous, cha paraît logique. Ouais, mais i n’feaut pos oblier que l’Picard de l’ainnée ch’est l’résultat d’ein votache.

I feaut aussi orpinser qu’dins no catégorie, on aveot  à faire à Bruno Coppens et Stéphane Pauwels, eine paire de grandes pointures, des « stars » dins leu spécialité. 

No Compagnie, elle n’a pos d’vedette(s) mais seul’mint des compagneons qui n’eont foqu’eine idée : ch’est d’s’amuser in vous amusant. I feont cha d’puis chint ans et aujord’hui, i’z’ amus’tent les p’tits infants ou les arrière-p’tits infants des prumiers sympathisants.

L’cabaret, ch’t’eine pétite interprise qui n’ conneot pos la crise parce qu’elle ne vind rien, elle deonne du bonheur. Et quand on deonne du bonheur, souvint on in orcheot in r’tour. Et pour tout l’bonheur qui nous eont donné, on ormercie ichi tous nos amisses qui z’eont noirchi l’case « E3 » su leu bulletin ou bin su l’Arnitoile.

In parlant d’interprise, ch’est Desobry qu’les votants i-eont queusi comme Super Picard 2008. Après l’cérémonie, ein p’tit rigolo i m’a dit : « C’est normal qu’ils aient gagné, de si bons biscuits c’est une publicité permanente ». Mi j’veux bin l’croire, mais l’malheur ch’est qu’on n’a pos pu vérifier si ch’teot vrai. L’orprésintante de l’société gagnante, elle est montée su l’podium in disant : « Nous fabriquons ein million d’biscuits par jour » et elle n’aveot même pos  pris eine boîte avec pou in faire goûter aux gins !

Nous-éautes au Cabaret on n’a pétête pos écrit ein millieon d’cancheonnes, mais quand on est arrivé su l’scène, on d’aveot pris eine avec et on l’a canté  au public !

Clovis