21 février 2009 par  L’Picard d'ichi  Magazine

Bonjour, savez, mes gins.

Je n’sais pos ç’que vous in pinsez mais mi je n’sais pos m’in ravoir !

On dit alfeos qu’in Belgique, i n’feuat pos grand cosse pour orlancher l’conflit linguistique mais je m’rinds queompte que ch’est souvint les ménapiens qu’i-ormettent d’l’huile su l’feu !

Attintieon, i n’feaut pos mette tous les flaminds dins l’même panier ! Mais n’impêche qu’on in veot avec eusses ! Z’avez d’jà vu  l’réactieon d’l’Unieon belche dins l’affaire du match Genk-Tubize ? Ch’est quand les flaminds i-aveot’tent berlé « Les Wallons, c’est du caca ! ». On veot d’jà tout d’suite à qui ç’que ch’est qu’on a à faire, éné ?

Et pour in rev’nir à l’Fédératieon, aller dire que ch’teot des chants « ludiques », presque folkloriques, j’trouèfe tout n’même que ch’t’ein manque de respect. Infin, quand on sait qu’à l’tiête,  i n’a béteôt pus qu’des flaminds, n’feaut pos s’attinte à des miraques !

Acor hureux qu’nos politiciens i s’ormuet’tent pour moutrer qu’nous-éautes les Walleons, on vaut mieux qu’cha ! Et no Rudy DEMOTTE in tiête acor ! Pasqu’à l’allure que cha va, on va béteôt s’faire écraser par mes gins. Et quand on sait qu’i seont les rois des agoneux, on pourreot bin s’faire mette in couleur.

Et l’pus bieau eximpe, ch’est bin l’suspinsieon d’no n’amisse Sylvio. Si cha,  cha n’est pos eine arnaque, ch’est tout comme ! N’pinsez pos qu’tout i-a été carculé pour que no jeueu i porte l’capieau…Et à m’mote que ch’est ç’qui va s’passer. Si ch’n’est pos honteux ! Je m’deminte tout n’même ç’qui-areot pouvu s’passer si i-areot jeué dins ein clup flamind ? Ou bin si s’neom i-areot comminché par « Van… ». L’suspinsieon elle n’areot seûrmint pos été l’même. On vit vraimint dins ein pays à deux vitesses. Si t’es du Nord ou bin du Sud, l’sanctieon elle n’est pos l’même !

In attindant, i n’feaut pus s’étonner qu’i-a des guerres quand on pinse que dins ein p’tit pays comme l’nôte, on n’se respecte pos. Pasque tout cha, pour mi, ch’est avant tout ein manque d’respect des Walleons. Je m’deminte si on fes’reot l’même qu’eusses…, quoisqu’i direot’tent ?

Essayez toudis, eine feos qu’vous êtes au-d’zeur d’Espierres, de canter « les Flaminds seont des andoulles… » et espliquer leu qu’ch’est eine cancheonne folklorique ! Je m’deminte si cha va les faire rire ?

Allez, à l’feos qui vient, mes gins

L’infant d’Tournai