3 mars 2009 par Clovis  

Bonjour mes gins.

Dins l’ temps, on alleot in vacances ein queop sur l’ainnée. Asteur, bé j’ai l’ sintimint qu’on part in voyache  cheonq à six feos in dousse meos.

A chaque pétit  congé, dins les gares, dins l’s aéroports,  ch’est toudis l’même tablature. Des masses de gins qui z’attin’tent  alfeos bin lommint.

Et avec cha, i-eont l’air contints presque béards. Ch’est pourtant les mêmes qui rouspètent quand i feont l’file à l’poste  ou bin à l’mutuelle ! Ch’est à n’ pus rien comprinte.

M’ cousin qui a été lommint à l’école, i m’a dit que tout cha ch’t’ à cosse de l’ diminutieon des prix des billets. Mais attintieon, i feaut vir c’ qu’i-a d’compris dins ces billets !  Ainsin mes visins i seont dallés, i-a quinze jours à Marrakech.

Ah, ch’est seûr, l’ticket d’avieon i n’éteot pos tchier ! Mais i-z-eont eu eine belle surprisse in comminchant ! Chint soixante euros d’supplémint pour leus bagages ! Eh bé milliards, cha ch’est ç’qu’on appelle ein départ in forche !

Et ch’n’éteot que l’ verre de binv’nue si on peut dire ! Pasque eine feos in l’air, l’arnaque elle a orpris d’ pus belle ! Ein verre d’ieau : quate eureos, ein (mini)sandwich : cheonq eureos. I z-eont fait l’queompte, rien qu’in « feaux frais » i d’eont eu pou l’aller et l’ortour pour treos chint nonante deux euros !

In puque i f’seot trois degrés au Maroc ! Ing’lés qui z-eont été les visins ! Quand on a intindu cha, on s’a dit qu’on aveot rud’mint bin fait rester à Tournai !

On s’a apprêté et on a partis pourméner tout au leong de l’Esquéaut. L’air i-éteot douche et  pa-d’seur l’ieau, les mouettes et les couleons voleo’tent comme des p’tits avieons mais gratuit’mint éné. On a pris l’apéro fin à s’naisse d’su l’ grand plache et après cha on a été minger  ein couscous royal. Ch’éteot ein vrai voyache « low-cost » et  sans pour cha d’voir indurer ein « vol sec ».

Clovis