24 mars 2009 par L’Infant d’Tournai  

Bonjour, savez, mes gins.

J’sais bin qu’on n’d’jà parlé l’sémaine passée que cha soiche dins les gazettes ou à l’télé, mais j’voudreos orvénir su les propeos du Pape ! Je n’sais pos s’i l’fait esprès mais i-a des momints qu’je m’deminte si i les a acore toutes ? Aller sortir, in Afrique, qu’on n’deot pus utiliser l’préservatif alors que ch’est dins ces pays-là qu’i-a d’pus in pus d’cas d’SIDA, ch’est vraimint s’foute des gins ! Et cha n’m’éteonne pos tell’mint qu’tous les pays i s’manifestent pou moutrer d’l’indignatieon d’vant parelle déclaratieon. On saveot d’jà qu’i-éteot conservateur, mais ch’est acor pus pire que cha ! Commint ç’qu’on peut t’nir acor des discours ainsin au 21ème sièque ?

Et in ç’qui concerne l’pétite fille qui s’a ortrouvé einceinte à nouef ans après avoir été violée, elle ne pourreot pos s’faire avorter pasque l’Eglisse, avec ein grand E, elle n’est pos pour l’avortemint ! Mi j’veux bin qui feaut toudis warder eine line de conduite mais j’trouèfe qu’ichi, i s’reot temps d’arrêter l’cirque pasque cha d’vient vraimint du n’importe quoi ! Et des idées ainsin, vous n’croyez pos que ch’t’ein manque de respect d’l’Humanité avec ein grand H ?

Je n’sais pos ç’que vous in pinsez mais si i n’canch’tent pos leu fusil d’épeaule, d’ichi ein momint,  i n’d’ara pus bramint qui ireot à messe et les églisses elles veont s’vider p’tit-z-à-p’tit. Et tout cha pasque l’Pape i veut faire passer ses idées qui datent de Mathusalem et qu’in agissant ainsin i va avoir tout l’meonte à deos ! Si cha n’est pos acor fait ! Et quand on veot que l’Vatican i deot alfeos rectifier les propeos d’Benoit, te t’demintes tout n’même si on f’reot pos mieux à Rôme de l’faire taire ein beon queop puteôt que d’toudis arringer l’s’affaires après, éné ? Infin, cha n’est que m’n’impressieon, mais j’vouleos vous l’deonner.

Allez, là-d’ssus, à l’feos qui vient, mes gins.

L’Infant d’Tournai