31 mars 2009 par Clovis  

Hé bé mes gins, cha y est, nous ovlà acor orpartis pour ein tour, éné !

Ein tour du cadran ahais ! Diminche au matin, in cangeant toutes les aiwiles dins l’maseon, j’busieos : cha fait asteur pus d’trinte ans qu’cha dure, ç’jeu-là et on n’sait toudis pos si cha sert à eine séquoi ! Les Eurocrates quand i-zeont invinté ç-bazar, i diseott’ent qu’cha alleot servir à écolomiser l’énergie et adeon des liards.

Bé ahais, tins ! Cha n’a rien cangé du tout, au cantraire ! Tout cha ch’est des coules in boutelle ! Des liards, bé on in dépinse seul’mint puque.

Et adeon ces fameux eurocrates, à m’meote qui n’meontrent pos fort l’eximpe. Ainsin, eusses, cha fait pus d’trinte ans qui feont tous les meos l’déplach’mint Bruxelles-Strasbourg avec armes et bagaches. Tout cha pasqu’i n’ saf’tent toudis pos décider dùsqu’i- veont placher l’sièche d’ l’Europe. Et cha vous pouvez m’croire,  cha coûte des millieons d’euros tous l’zans, qu’on soiche à l’heure d’été ou bin  à ceulle d’hiver ! 

Et puis j’pinse aux paufes gins qui ouèf’tent, vraimint eusses, pos comme les eurocrates éné, et aux infants qui doif’tent s’lever pus timpe. J’pinse aux parints qui doif’tent mette les infants à leu lit pindant qui fait acor clair. Va-t-in leu n’ espliquer qu’ch’est l’heure d’aller dormir ! Et puis les biètes elles n’ seont pos fort hureusses neon pus d’ jeuer dins ç’jeu-là. Ainsin, quand on aveot acor des cats à no maseon, i falleot vir leu tiète quand on s’leveot eine heure pus timpe ! Cha les dérinvieot et à cosse de cha, i- brousseo’tent pindant deux s’maines intières ! J’ai même li dans eine gazette qu’les vaques laitières i-éteotent vraimint tout caché- perdu à causse de ç’cang’mint et qu’elles donneo’tent ein lait moins gras qu’d’habitude ! Et on s’étonn’ra que l’ bure n’a pus l’même goût ! Mais pou l’prix, cha i-n’a pos d’ cang’mint.

Quand j’vous l’diseos, cha n’sert à rien ceulles acrobaties horaires !

Beon asteur, tout cha n’deot pos vous impêcher d’venir  acouter no p’tit cabaret saim’di qui vient à huit heures au soir, heure d’été. Attintieon, ch’est l’ deuxième et dernière séance. L’ troisième cha s’ra pour les mossieurs et les madames l’ diminche 19 avril à quatre heures d’ l’après deiner. I-ara ein programme espécial. Allez vite acater vos cartes (7€) à l’Gestion Centre Ville 8 rue Saint Martin.

L’bénéfice i-s’ra orversé à Télévie, cha n’s’ra pos gaspillé,  cha ch’est seûr !

Clovis