8 mai 2009 par  L’infant d’Tournai  Magazine

Bonjour, savez, mes gins.

Ceulle feos-chi, cha z’y est ! Nous ovlà qualifiés pou l’tour final !

Et j’pinse qu’i n’d’a pos bramint qui osreot’tent dire que ch’n’est pos mérité ! Après l’saiseon qu’les « Sang et Or » i z’eont fait, ch’est tout à fait normal qu’on l’s’ortrouèf’tent dins les cheonq prumiers.

Vous m’direz : « Et asteur ? ».

Quoi « et asteur ? ». Bé on va jeuer tins et on voirra bin.

L’principal ch’éteot d’y ête et on va toudis c’mmincher par l’match de ç’soir cont’ l’Antwerp. Rien qu’cha, ch’est déjà eine fin belle affiche. Je n’sais pos si vous vous souv’nez du match qu’on a vécu au state Luc Varenne, mais mi ç’que j’ai ortenu ch’est qu’cha valeot ein match d’divisieon 1 ! Et pou ç’qu’i-est du match ortour, on n’a toudis pos été ridicules !

Alors quoisque cha va donner à ç’soir ? Ch’est bin difficile de l’dire mais ç’qu’i-a d’seûr et d’certain, ch’est qu’nos jeueux i veont m’ner l’vie durte à les Anversois. Et comme i’s eont prouvé diminche passé à Eupen qu’tout i leu réussi in ç’momint, i s’pourreot bin qu’on ortrouèfe no Fotbal Clup au deuxième tour avé les clups de prumière divisieon !

Mais feaut pos croire pour cha qu’on va s’ortrouver dins l’élite l’saiseon qui vient ! Je n’sais d’ailleurs pos si cha s’reot eine beonne affaire, savez ? Surtout, si i feaut aller jeuer à Mouscreon comme Jean-Claude Stocman i l’a dit dins l’gazette. Acor eine déclaratieon qu’i-a du plaire aux édiles qui s’seont mis à l’quémisse pou construire l’State Luc Varenne et asteur qu’i-est fait, on ireot jeuer au Canonnier ? Ch’t’eine histoire de seot, cha ma parole !

Infin, on n’in est pos acor là. On va toudis bin profiter du match de ç’soir in espérant que l’victoire elle soiche au rindez-vous.

Allez mes gins, à l’feos qui vient…

L’infant d’Tournai