21 novembre 2009 par  L’infant d’Tournai  Magazine

Bonjour, savez, mes gins.

Z’avez vu cha dins l’gazette l’z’évén’mints qui s’pass’tent asteur dins les matches d’jeones ! I-a d’cha, deux s’maines, ch’t’ein intraineu du FC qui s’a fait taper d’su par eine supportrice de Beveren pindant qu’deux éaut’s i tapeot’tent d’su l’arbite ! Et l’malhureux tournaisien i s’a ortrouvé à l’hôpital, i-a d’vu s’faire opéré et asteur i n’peut pus ouvrer pindant acor ein meos ! Et tout cha à causse d’eine binte de sauvaches !

Et l’ov’là que l’sémaine passée, ch’est des supporters de l’Antwerp qui z’eont buqué su des jeueux d’Eupen !

Pou ç’qui-est du FC, cha a fait l’tour de l’régieon et l’presse elle a bin seûr orlaté les faits. Mais pou l’Antwerp, là ch’est l’presse nationale qui-in a parlé et tout l’pays i r’met cha su l’deos d’ein nouvieau problème linguistique ! I paraitreot qu’les supporters anversois i z’areot’tent crié au gardien d’Eupen, à l’fin du match « Sales Walleons » ! Comme si qu’les flaminds i z’os’reot’tent dire cha ? I n’seont pos ainsin !...  Ch’est mal les connaîte…

In attindant, va-t’in proposer à les gins d’inscrire leus infants dins in clup de fotbal quand t’intinds tout ç’qu’i s’passe ! Et on voudreot après cha qu’les jeones i respectent l’s adversaires et l’s arbites alors que leus parints i tap’tent d’su !

Les clups i doiv’tent réagir et Beveren i l’a d’jà fait l’lind’main d’l’incidint : i z’eont téléphoné à l’intraineu tournaisien pou s’escuser – i n’manqu’reot pus qu’cha – et pou li dire que les infants i z’aveot’tent été éliminés du clup !

Cha fait qu’ainsin, ch’est eusses qui doiv’tent payer les peots cassés ! Et à m’n avis qu’cha n’cang’ra rien au problème : si les infants i s’in veont jeuer ailleurs, bé les parints i z’orf’reont leu cirque dins ein éaute clup, tins ! 

Les gins d’l’Antwerp i-eont aussi dit ç’qu’i pinseot’tent de ç’t’affaire mais là ch’est plus compliqué pasqu’i s’orjet’tent l’balle.

In attindant, dins tout ç’touillache, ch’est l’fotbal qu’on est in train d’salir et cha n’est pos in s’tapant d’sus qu’on va orlancher et améliorer l’formatieon des jeones in Belgique. On s’plaint alfeos qu’i n’a pus d’respect, mais dins l’feond, les jeones i n’feont qu’suife l’eximpe d’leus parints, neon ?

Infin, j’espère que tout cha i va bin vite s’calmer et qu’on pourra acore aller vir ein match …sans risquer d’orchevoir ein queop d’parapluie su s’tiête…

Allez, à l’feos qui vient, mes gins.

L’Infant d’Tournai