4 avril 2012 par Du beos d’chuque

D'abord j' vous dis d'eine traque que cha n'est pos d' magie que j' vas vous interténir, bin que ç' vingt-quate de Mars ç' qui s'a passé ichi à Tournai ch'éteot ein évén'mint estraordinaire.

Ouais mais quoisqu'i s'a passé? Et bin j' vas vous l' dire.

Ch'éteot les chint jours avant l'arrivée d'eine étape de l' grante boucle. El' grante boucle.... ch'est queoi d' cha?

 Bé bin seur el' Tour de France à véleo. Et ch'est pour cha que ç' saim'di 24 d' mars on a rassimblé eine paire de gins qu'i-aveot'ent à vir avec tout cha.

Ah on peut dire que cha n'aveot pos été fait dins l' misère pasque t'areos vu les gins qu'i-aveot là à l'étache de no Halle aux draps et bé cha n'éteot pos n'importe quoi! Dins l'z'invités i-aveot ein champieon du meonte, ein incien orcord'man de l'heure et presque vainqueur du tour et même el ceu qu'i-aveot été maite de tous mes gins pindant eine masse d'ainnée (in l'occurince Jean-Marie Leblanc).

Et bin d'vant tout ces gins qu'iaveot'ent glorifié ceulle épreufe cycliste estraordinaire i-aveot avec eine paire de vedettes locales quieont mis d' l'animatieon inter les passaches d'interview des ceusses qu'i-aveot'ent été l'z'animateurs de ceulle grante épreufe. Et là j' pinse que les ceusses qu'i-éteot'ent d'sus l' ponteon pou l'animatieon i pouveot'ent ête fin fiers de s' moutrer pa-d'vant mes gins.

Je n' vas pos ichi les citer pasque inter Tournaisiens on éteot fiers d'ête présints à ceulle manifestatieon mais ç' que j' peux vous dire in finissant ch'est que d' finir in cantant « Les Tournaisiens sont là » pa-d'vant tout ces gins qui-eont illustré ceulle épreufe i-aveot d'quoi ête fier de no ville.

Du beos d'chuque