25 avril 2012 par Tiête de lard

Cha y-est, i n'a pus qu'eine paire de queops à dormir et nos visins Français i veont d'aller voter.

Ch'est vrai qu' nous eautes tertous ichi à Tournai et dins l' z'invireons, on aim'reot bin d' savoir qui qu' ch'est qui va ête el' nouvieau Présidint d' nos amisses Français, et ch'est pour cha qu'i d'a beauqueop qui suiftent l'z'élections présidintielles in France.

Mi, je n' rate pos ein débat ou l' journal parlé in France.

J'ai bin du plaisi. A chaque queop qu'on leu posse eine questieon, i r'caitent toudis d'sus leus pattes et i z'eont, comme i direot ein amisse qui est du Borinache: «toudis l' broque à mette au tréo».

I z'eont tertous el' solutieon à les problèmes qui a lommint qu'i n'a justemint pos d' solutieon.

I veont tertous donner d' l'ouvrache à tertous et aurminter les trait'mints d' tertous et faire batte du plat à les ceusses qui feont tout pour imbêter les gins, que ç' soiche pou l' sécurité ou bin pour eaute queosse.

D' toute faceon, les problèmes in France, ch'est les mêmes qu'ichi in Belgique..... infin ç' qui d'meure de l' Belgique!!!

Diminche au soir, au «prumier tour des électieons », j' vas faire eine chère de roi à acouter les deux ceux qu' les Français i-aréont queusis pou l' deuxième tour.

J'vas faire beonne chère avec à acouter les ceusses que cha s'ra fini pour eusses et qui veont tout d'même dire qu'i n'eont pos perdu alors qu'i n'eont pos été élus; Infin, que ç' soiche in politique ou bin dins d'eautes sociétés, i d'a toudis qui n' veul'tent pos r'connaîte qu'i n'eont pos été élus.....

Ch'est bin malheureux, mais ch'est ainsin!

Tiête de lard