11 juillet 2012 par Catoire

L'arrivée du Tour de France dins no ville, cha ara coûté cheonq euros à chaque Tournaisien. Mais attintieon, n' pinsez pos qu' ch'est des liards pierdus.

Pasqu' asteur que l' Tour i-est d'allé, i paraît qu' tous les liards dépinsés i veont rapporter bramint à no beonne ville. A cosse, comme on dit à l'Régince du «coup de projecteur immense offert par le Tour».

Ah, les hélicoptères i z'alleum'tent leus phares in plein jour asteur ? Si ch'est vrai adeon, pinsez à tous les gins in Europe qui-eont ravisé Tournai d'in haut, ch'est seur qu'après cha, i veont tertous aqueurir pour contimpler tous nos mervelles.

Toudis d'après l' Régince, i-a d'jà des Flaminds, des Hollandais et des Français qui seont v'nus in orpérache.

J'espère pour ceulles «avant-gardes» qu'i z'areont mis des beons sorlets pou n'pos torte leus pieds dins les treos des trottoirs ou bin dins ceusses des chantiers abandonnés, des sorlets avec des s'melles sans rainures, ch'est pus facile à nettier quand on marche dins les brins d' tchien.

J'espère pour eusses qui n'areont pos pris des médicamints pou picher avant d' venir pasque les «toilettes publiques» à Tournai ch'est comme les oasis dins l' désert, i n' d'a pos bramint et alfeos on cait su ein mirache pasqu'elles sont freumées ou bin «hors service».

J'espère pour eusses qu'i n' queusireont pos d' débarquer du lundi pasque ç' jour-là, la mitan des magasins et des restaurants i seont serrés.

In parlant d' mitan, j'espère qui s'reont d'allés vir eine curiosité rarissime, eine mitan d' boul'vard rénovée et l'eaute mitan laichée comme avant, j espère qu'i-areont pu compter tous les rustines qu'on a mis su l' ville pour l'occasieon, les vraies et les fausses.

Infin si après tout cha, i z'eont été in boire eine au soir, j'espère qu'i n'areont pos été su les quais, pasque là, on risque alfeos bin pire qu'ein pied tordu.

J'espère, in tout cas, qu'i pourreont raller à leu maseon presqu'intiers pour dire à leus amisses : vu d'in haut, Tournai ch'est bieau, mais vu d'in bas Mama Mia !

Catoire