19 septembre 2012 par Robot Cop

Je n' sais pos si t'as d'jà vu in ville des tchiens qui porméneottent in laisse avec eine mus'lière. Te m' croiras si te veux, mais mi, eine feos onze heures du soir, j'ai l'impressieon que j' fais partie d' ces biêtes.

Neon, pos que j' sus dangereux au point de m' mette eine muselière ni qu' j'ai d'z'invies d' foute l' camp pou ortrouver eine maîtresse, neon ch'est eaute cosse et j' vas t' l'espliquer.

Tout i qu'minche à cosse de m' feimme (ch'est souvint ainsin que l'z'imbroulles elles qu'minch'tent). V'là qu'elle trouveot que j' ronfièle tell'mint que cha l'imbêteot au point qu'i-a des nuites qu'elle s'in va dormir dins l' champe d'amis (ch'est pou cha que j'n'invite pus d'amisses à dormir, m' feimme elle s'reot capape d'aller dormir avec eusses)

Adeon, m'ov'là parti in clinique pou eine nuit du sommel qu'inter parinthèsses, ch'est eine belle mintirie, pasque va t'in trover l' sommel avé tous les fils que t'as su l' tiête.

N'impêche, j' deos bin dire que malgré que ch' n'est pos agréape, l' service qu'i-a là à l'IMC, i-est formidape; compétince, amabilité, tout y est ; d'puis l' feimme de ménache jusqu'à les docteurs in passant pas l'z'aites soignantes et l'z'infirmières, ch'est au ceu qui est l' pus attintionné avec ti que ch'est tout jusse si t'as pos invie d' rester là (infin, presque, i n' feaut pos exagérer tout d' même) , t'es aussi bin gâté qu'à l'hôtel, sauf pou les r'pas que cha, ch'est à braire. A côté d' cha, l'Mac Do ch'est ein treos étoiles, infin, ch'est pos pour cha qu'on est là, n'impêche.

Résultat des courses : m'ov'là beon pou ein apparel pou mi dormir : eine espèce de masque avé ein leong tuyau à n'in pus finir qu' t'as peur qui s'inroule autour de ti comme ein boa qui t'étouff'reot, l' tout branché su l' tape de nuite à eine sorte de constateur comme les coulonneux sauf que les convoyeurs i n'attintent pos et que te n' peux mau d' toucher eine prime à l' fin de l' nuite.

Avec cha, i parait que je n' ronfièle pus et que m' feimme elle est continte (ch'est toudis cha) et surtout qu'elle reste dins l' lit (du moins, je l' supposse pasque comme j' dors convenablemint, j' peux juste dire qu'elle elle là au matin).

Mais elle n'a rien à crainte, elle peut avoir mau à s' tiête, ch'est sins dinger, pasque harnaché comme cha, ch'est l' meilleu des moyens d' contraceptieon, ch'est p'tête pour cha qu'on appelle c't'apparell, eine 6 papes... d'jà qu'avec ein pape, i-est pos questieon d' cha alors te pinses avec six... I n'a pos d' risque. D'jà faire el pétit bisou du soir, cha s'apparinte aux esploits des gymnastes aux JO alors te pinses... l'reste.

Infin soite, j'osse pos m' raviser dins l' glache eine feos qu' j'ai mis tout cha su m' guife, te croireos ête pilote d'essai dins ein avieon supersonique. D'ailleurs, l'eaute jour, m' feimme elle m'a dit « Beonne nuite Gagarine », i n' feaut pos d'minder.

Beon, j'arrête ichi, j' m'in vas m'astiquer pou dormir.

Pour eine feos je n' vas pos signer avé m' neom habituel, j'ai bin trop peur qu'on m'orconnaîtreot. T'as l' choix inter les 18 cancheonniers du Cabaret, te peux même l'z'imaginer l'z'eins après'l'z'eautes avé s'n'appareillache...mais surtout n'invite pos Serdu pour péréniser ç' tableau !

Robot Cop