21 novembre 2012 par Catoupi

Verdi passé, j'aveos pris congé, et comme j'aveos l' temps, j'ai eu invie d'aller m' pourméner dins les magasins. J' pinseos aussi d' faire des beonnes affaires : j'aveos r'chu de l' sémaine des beons d' réductieon au magasin Queulroyt, avec in puque ed' cha treos pourchints su l' total de m' ticket d' caisse. A croire que tout l' ville elle s'aveot là deonné rindez-vous, pasqu'i n'aveot pus d' plache au parkinne. Adeon, comme j'aveos aussi ein beon d' réductieon chez Awéwé, j' m'ai dit qu' j'ireos là-vas d'abord; i m' falleot acater pou vingt euros et on m' mettreot chint points d' puque su m' carte Benhaize. Cha fait qu' j'ai acaté du terreau, eine paire de peots d' fleurs (j'aveos oblié que m' feimme d'aveot acaté l' sémaine d'avant), du produit pou tuer l' cruéau qu'i-a dins l' piéchinte pa-d'vant m' maseon, et eine carte pou l'anniversaire de m' pétite filleule (ahais, i-a même cha chez Awéwé !). Total : j' d'ai eu pou passé trint'-cheonq euros, et j'ai bin mérité mes points d' fidélité !

Après cha, comme j'éteos tout près du magasin Kamma, j'ai été faire ein p'tit tour; feaut dire que j'aveos dreot aussi à des points, mais ceull' feos-chi su m' carte Harrydaiz; in puque, j'aveos r'chu l' beon de m' bieau-frère, qui n'est pos bricoleu pour ein sou et qui n' va jamais dins ç' magasin-là. J'ai acaté eine rallonche ed' trinte mètes (cha peut toudis servir), eine paire de planques pour faire eine étagère (quand j'arai l' temps), et toutes sortes ed' bricoles pos tcher qu'i-a là dins ein bac et qu'on s' déminte alfeos si cha n' va pos casser l' prumièr' feos qu'on s'in sert. Total : j' d'ai eu pou chinquante-cheonq euros; cha cayeot bin pasque pour avoir dreot à chint points, i falleot acater pour vingt cheonq euros; avé l' beon de m'bieau-frère, cha m'a fait deux chints points d' puque su m' carte. J'ai quand même fait eine beonne actieon : j' li ai acaté eine boîte ed' cleos et ein martieau dins l' bac à bricoles... ainsin, i n' m'appell'ra pus au s'cours chaque feos qu'i d'vra mette pinte ein cadre !

Comme i-éteot alors midi, j'ai busié qu'i-areot mouins d' meonte au Queulroyt. Tins, j'alleos quand même pos rater tous les réductieons qu' j'aveos dreot ! J' d'ai eu là pou chint chinquante euros, mais t'nez-vous bin, j'ai eu pou dix euros d' réductieon in puque des treos pourchints, adeon presque quinsse euros dins m' poche à l' sortie !

Si j' fais l' total de ç' que j'ai gagné su m' journée, hé bé, cha fait, euh ... tins bé au fait, je n' sais pos ç' que cha veaut, ein point Benhaize obin ein point Harrydaiz... infin, j'ai bin profité des beonnes occasieons...

Mais j'y pinse, avé tout cha, j'ai acaté d'z'affaires que j'aveos pos b'souin... obin in grante quantité pour avoir el' réductieon (j'ai pou dix ans d' produit d' vaisselle)... In puqu' de cha, j'ai fait vingt cheonq kilomètes avé m' carette, adeon cha m'a coûté d' l'essince ! Au prix qu'elle est asteur !

Ah, mais cha, cha cait bin, pasque j'ai dreot à des points à l'estatieon Sholl ... avé mille deux chints points, on orcheot eine bieau nain d' jardin !

Catoupi