D'Henry Thauvoye

{mosimage} Vous pouvez maintenant écouter la chanson.

1

Ch’est nous éaut’s les gosses
De l’ vill’ de Tournai :
Ein’ bint’ de p’tit’s rosses
Trainant d’sus les quais !
Sans ein’ beonne avisse,
On nous veot souvint,
Toudis plein d’ malice,
Fair’ rager les gins !

Refrain

On in fait d’ tous les sortes
Sonner à les portes(bis)
Et fair’ cair’ les séeaux
Quand i seont plein d’iéeau !(bis)

2

L’écol’ nous imbête,
On n’a pos b’souin d’ cha !
Véaut mieux fair’ queuette,
Queurir à l’chita !
On n’a pus d’haleine
D’ jeuer aux voleurs,
Puis on va d’sus l’ plaine
Vir les P’tits Chasseurs !

Refrain

Au boul’vards zous les abres
V’la qu’on jeue à mabres(bis)
On s’amusse à s’ touiller
Et puis à batt’lier !(bis)

3

Près de l’ Cathédrale,
Ch’est là qu’on est l’ mieux
Pou bin ruer s’ balle
Su l’ tiêt’ des Mossieux !
Et v’la qu’on dispute
Pour ein’ guiss’ de beos :
On s’ fout des queops d’blutte,
D’ cachoire et d’ chabeots

Refrain

Comm’ l’agint nous orwette,
On r’jeue à l’ guilette(bis)
A l’ toupie, au boucheon
Ou bin au rogneon !(bis)

4

Mais quand ch’est l’ Karmesse
Sus l’ plach’,queu bonheur !
On séautte à l’ punaise,
D’sus les planqu’s on queurt !
Pou suif’ les baraques
Sortant d’ l’estatieon,
On trouèf’ bin des craques
Au soir…… à s’maseon…..

Refrain

Mopèr’ cri : Tas d’rambiles !....
I nous flanqu’ des piles ! (bis)
Et mamèr’, du mêm’ beond,
Ein bieau cachiron ! (bis)