Humeur
Avec el' printemps et les jours qui rallonch'tent, el' timpérature comminche aussi à radouchir , ch'est quand même pus agréape qu'ein beonne gélée. Au gardin on a mis ses prumières penn'tières, les quéautes comme on dit. Ch'est bin simpe, quand ç' que m' louchet i m' veot arriver i trane comme eine fouèle. Comme tout comminche à pousser, cha veut dire que l' pelousse elle a poussé avec, et cha veut aussi dire que l' corvée de l' teonte de l' pelousse elle a orcomminché comme tous les ans.
Bé cha y-est, cha rapproche . Bé ahais tins les cloques elles veont béteot s'in aller et du diminche de Pâques et bé elles veont orvénir. Cha s'ra fiête pou tous les ceusses qu'i-eont acore des p'tits rot'leots qui s'reont fin contints d' queurir dins les gardins pou vir tout quoi ç' que Marie-Pontoisse elle ara là pondu.
Banjour mes gins. Comme vous l' savez, l' Cabaret Wallon i fait souvint des spectaques philanthropiques au profit d' beonnes œuvres. Ch'est ainsin que l' diminche 23 avril, i-ara ein p'tit cabaret au profit des patients sclérodermiques. La sclérodermie, ch'est eine maladie pos bin connue, et si vous voulez in savoir puque, i vous feaut aller vir su www.sclerodermie.be, pasque je n' sus pos qualifié pou vous parler d' cha. Mais ç' qui-est seûr, ch'est qu'i-a toudis moyen d'aider à soigner les malates, tout in passant ein beon momint dins l' beonne humeur. Adeon, n'hésitez pos, tous les rinsein'mints i seont su l'affiche pou v'nir vir eç' cabaret. À diminche !
Après les vacances de Pâques, ch'est l' périote des fiêtes d'école qui va qu'mincher. Dins les s'maines à v'nir et jusqu'au meos d' juin, les p'tits infants i veont faire leu prumiers pas su scène pa-d'vant ein parterre tout acquis à leu causse. I feaut dire que pou l'z'écoles ch'est aussi ein moyen d'avoir ein p'tit peu d'liards pasque si i feaut attinte l' meonte politique pou busier à les écoles, te peux acore attinte, i n'a pus d' liards pou cha. I feaut dire qu'on a pu vite fait pour rinflouer les banques ou bin pou payer les managers au salaire indécent ... par hasard là des liards on les trouèfe tout d'suite.
M' feimme i-a acaté ein pèse-personne. Elle m'a forché à meonter d'ssus ... et là, j'ai compris pourquoi qu'on appelle cha eine balanche. J'in sus seûr et je l' confirme. Ch'est traîte, cha dénonche tout. Eine balanche, pire que dins l' mafia ou dins les commissariats. T'as mingé des chucartes, t'as bu ein verre in puque obin t'as mingé ein paquet d' frites à l' mayonnaisse, tout de suite elle te moute du deogt ou putôt de s'n aiwille. T'es raccusé sans rémissieon. T'orwettes pa d'zous et là, te veos l' résultat de ç' que t'areos d'vu éviter. Queu sale biête que ç' manicraque, cré milliards. Fausse-gins, jésuite, soucard ! Pou ête tout à fait seûr que te l' voiches, i-a l'éclairache su l' cadran. I n' d'a même qui parl'tent. I paraît qu' ch'est pou l's aveules obin pou quand te n' veos pus clair ou que t' panche t'impêche d' vir el' cadran. I n' d'a d's eautes qu'i-eont eine mémoire et t' rappell'tent l' poids qu' t'aveos l' queop d'avant.
J'ai li dins l' gazette qu'on a d'jà vindu des dizaines de mille de drones d'puis l'intame de ç't ainnée. J'ai été vir au marché pou faire eine beonne affaire. J' sus allé l' saim'di à l' Plache Crombez. I n'aveot nu boutique qu'i-in vindeot. Des jeones gins bin élevés i m'eont espliqué qu' ch'éteot des manicraques que t' pouveos vir pa d'zeur ç' qui s' passeot in d'zous. D'jà qu'à Tournai, i t' feaut bin raviser dusque t' mets tes pieds, asteur i t' faudra rwettier ç' qui s'passe au d'ssus de t' tiête.
On dit alfeos qu' les politiques i n' réfléchiss'tent pos. Pétête bin, mais cha ch'est ailleurs qu' à Tournai. Pasque ichi à Tournai, cha fait d'z'ainnées qu'on dit qu'i feaut tout faire pou qu' les gins i veont à véleo. Feaut limiter l' pollutieon, feaut faire ed' l'exercice, ch'est meilleu pou l' santé. D'abord, on a approuvé d' faire des pistes cyclapes. L' problème, ch'est qu'i-a des bordures dins tous les coins d' rue, et te bourrièles ou bin t'as des boches à t' derrière ; ou bin i-a des gravilleons su les pistes et t'attrapes des fuites.
Les cabarets d' mars, ch'est ... in mars. Adeon, i-est d'jà v'nu l' temps des cabarets de l' deuxième série de p'tits cabarets, après les ceux du meos d'janvier. Ein tout nouvieau programme, qui colle à no n'actualité. Au Cabaret Walleon, i z'eont voulu faire eine espérieince l'ainnée passée, et i z'orcomminch'tent ç't'ainnée. J' vous esplique. I-ara eine prumière séance, du verdi 17 mars au soir, que ch'est comme d'habitute réservé à les heommes. Adeon, les gins du sexe "fort", qui z'eont d'jà leu carte, i rint'tent pour rien. Les ceusses qui n'eont pos cor leu carte, i peuf'tent l'acater et i z'areont deux intrées gratuites pou les grands cabarets au meos d'octope.
Bonjour, savez, mes gins. J' m'ai fait ceulle réflexieon i-a d'jà eine paire de s'maines avé tout ç' qui s' passe chez nos amisses français. Les électieons i z'approch'tent et on nous anneonche toutes seortes d' magoules à guéauche comme à droite. A chaque feos qu' t'ouvères l' télé, berdaf, eine nouvelle affaire ! Vous s' souv'nez certain'mint qu'i-a eine paire d'ainnées, et quand ç' que j' dis eine paire, on devreot dire eine paire de paires, i-a eine histoire qui-a éclaté in France avé l' fameux DSK. L' fameusse histoire du SOFITEL.
Salut mes gins, j'vas chi vous parler du cadéau que j'ai fait à m'feimme pour el' saint Valentin. Si vous vous souv'nez, i-a deux ans, j'aveos oblié de l' souhaîter, et l'ainnée passée j'aveos offert ein bieau bouquet d' fleurs mais j'aveos laiché l' prix sus l'imballache. Adeon, ceulle ainnée, pour marquer l' queop, j'ai offert à m' feimme eine séance de massache . Elle éteot toute surprisse mais elle a quand même été et, à m' grante surprisse à mi, quand elle a widé de d'là, elle éteot tout à fait ravie et orquinquée.
L' photo su m' permis d' conduire, ch'est acore ceulle que j'aveos 20 ans. Meon, qu' j'éteos ein bieau jeone heomme. Eh bin ! I paraît qu'in France, j' pourreos avoir des misères pasque j'ai fort cangé. Pourtant, j'ai jusse quéques kilos in puque et j' sus acore bin de m' perseonne. J'arrête pasque j'intinds d'jà canter l' chœur des démépriseusses. J'ai li qu'asteur i-aveot ein nouvieau règlemint européen su les modèles des photos pou les documints officiels. Te n' peux pus t' faire tirer l' portrait comme te veux. Cha deot ête pris d' face. Te n' peux pos queusir t' meilleu profil. Si t'as l' créon nez, feaut qu'on l' voiche. Te n' peux pos neon pus raviser su l' côté, même si i-a eine belle pouillette qui passe.
Mais qu' ch'est dur à m'n'âche ! Si j' vas dormir à eine heure du matin, i m' feaut eine sémaine pou m'ormette. Ténez : saim'di de l' sémaine passée, j'ai été vir el' Cabaret à la Halle aux draps. Acor eine feos bin du plaisi dins eine salle toute pleine. Du diminche, ch'éteot l' troupe de l' relève St-Eloi d' Froyennes qui f'seot ein spectaque. J'aime autant d' vous dire que du lundi, j'éteos mate. Et du mardi avec, et même asteur je n'sus pos cor tout à fait ormis. Surtout que d'puis, j'ai été invité à ein anniversaire in pleine sémaine. Mais i n'a rien à faire, i feaut s'ormette in route, vu qu' ch'est béteôt l' périote des carnavals.
Ch'est l' chand'leur ! Et quoi ç' qu'on minche à l' chand'leur ? Des coucoubaques, bin seûr ! Quand j'éteos p'tit, m' manman elle n'attindeot pos l' chand'leur : elle faiseot des coucoubaques à peu près tous les s'maines. Cha sinteot beon quand elle les f'seot cuire su l' païelle. Cha sinteot d'jà beon quand elle aveot fait meonter l' pâte tout près du feu pindant l'après-deîner. Du soir, au souper, j'in mingeos alfeos sièt ou huit, avé du burre et de l' castonate. De l' brune, hein ! et quand l' burre i fondeot, avé l' castonate qui dev'neot tout liquite, queu beonne chère que j' faiseos, rien qu'à l'orwettier. Mais alors quand j' metteos chaque bouchée dins m' bouque, ch'éteot... commint dire... indescriptipe ! In deux queops, l' coucoubaque éteot oute.
Avant tout mes gins, j' vous présinte mes beons vœux pour 2017. Ceulle ainnée n' pourra pos êt' pire qu'in 2016 avec tout ç' qu'on a vu surtout qu'in puque, mi, j'ai eu m' billet d' sortie à l'ouvrache après pus d' trint'-cheonq ans dins l' même boîte. Pourtant, margré que j' sus-t-eine bleonte, j'ai ein beon diplôme et j' parle treos lanques in puque d' no patois bin seûr, mais pou l' nouvelle directieon, j'ai cru comprinte que j' n'éteos pus adaptée pou les nouvieaux défis... n'importe quoi !!!
J'alleos au boutique, comme tous les jours, pou acater m' boustifale. J' porméneos bénaisse, les mains dins mes tasses vu qu'i f'seot freod et que l' vint i chireot. « Allez, banjour, Nini, te m' mettras ein pain copé, eine tranche d' mutiau et deux d' fromache. Avec, t' peux mette treos tomates, deux porieons et quate puns d' Rongy. » J' paye et j' rattinds. J' rattinds acore, j' l'orwette, et elle me dit à r'voir.
Bonjour, savez, mes gins ! Tout d'abord, j' voudreos souhaiter à tous nos lecteurs du Proximag eine beonne et hureusse ainnée 2017. Pour vous-z'éautes et tous les ceusses qui vous seont chers, comme on dit ! Et avec ceulle nouvelle ainnée, et après les deux réveilleons qu'on vient d' vife, i-a acor ein grand momint qui s'anneonche dins no ville : ch'est l' lundi perdu, qu'i d'a qu'i-appell'tent cha « l' troisième réveilleon ! ». Surtout n' disez pos « Lapin perdu » comme on veot dins des restaurants ou bin des magasins. Si l' lapin i s'reot perdu, commint qu'on f'reot pou l' minger, à vo meote ? Nous-z'éautes au Cabaret, vous pinsez bin que l' lundi perdu, ch't'eine traditieon qu'on respecte !
Cha f'seot lommint que j' n'aveos pus été au cinéma. Mais l' sémaine passée, j' m'ai décidé à aller vir ein nouvieau film qui v'neot d' sortir. S i j' vous dis l' titre, vous n'allez pos m' croire. Adeon, je n' vous le dis pos. D'abord, j' prinds m' ticket. Inter nous soit dit, ch'est pos pour rien, l' cinéma asteur ! Dusqu'i-est l' temps qu'on acateot s' plache pou chint francs au Variété ou au Palace !
Milliard qu'i m' fout l' barpe em' visin ! I n'arrête pos d' m'imbêter, et on n' peut rien li dire. Et quand on li dit eine séquoi, i-a toudis eine pièche à mette au treo. Par eximpe, l'éaute queop, j' li dis ainsin qu'i s'reot temps qu'i queope l'hierpe dins s' gardin, vu qu' les pichoulits i commincheotent à avoir des s'minches. I m'a répeondu ainsin : « j' n'in peux pos si i-a pleut et qu' cha pousse pus vite, tout n' même ! ». I-a cor attindu deux s'maines, à croire que ch'teot rien qu' pour m'imbêter.
Salut mes gins. Je n' sais pos si vous avez vu les résultats du rapport PISA, mais in tout cas, vous in avez certain'mint intindu parler, ch'est eine évaluatieon sus l' valeur des étudiants in Europe. Eh bin, j' sus bin obligé d'avouer qu'in Wallonie, on n'a pos d'quoi ête fiers. Non seul'mint on est leon d'ête in tiête, mais ç' qui est cor pire, ch'est qu' les flaminds i seont bin avant nous z'eautes, et cha j'ai bin du mau à l'avaler.
Bé je n' sais pos vous z'éautes, mes gins, mais mi, quanç' que j'ouvère em'n'aginda, j'ai alfeos invie d' m'infuir in queurant. Je n' sais pus par dù ! Eine feos passé l' meos d' novimpe qui-est à mitan calme, on est parti pou fiêter tous les saints : et l' pire, ch'est Saint-Nicolas, vu qu'on l' fîete à l' maseon, chez les parrains, les marraines, chez les pépères, les mémères, les papys, les mamys, les moneonques et les matantes. In attindant, tertous i dépinse bramint des liards pou faire des cadéaux à les infants qui seont tell'mint gâtés qu'alfeos i-oblit'tent d' dire merci. Et bin seûr on beot ein p'tit verre et alfeos on minche ein morcieau.
Sifet ! Pasque leu métier, que ch't'ein métier difficile et dingeureux, ch'est d' rinte service aux gins. Toudis su l' brèche pour aller combatte les incindies (hureus'mint cha n'arrife pos trop souvint), aider quand i-a d'z'inondatieons – cha, les gins d'Ere et d' Will'meau i-in saf'tent eine séquoi – , arrêter les pollutieons d'ssus l'Esquéaut, orpêquer des noyés, donner les prumiers s'cours aux accidintés que ç' soiche in carette, dins les rues ou même dins les maseons, aider l' police quand i-a ein huluberlu qui veut saut'lier du quatrième étache ! Et j' pourreos acore donner bin d'z'éautes eximpes de tout quoi ç' qu'i feont pour aider les gins ! Alors nos pompiers, on les aime bin. Et l'harmonie communale avec. Pasqu'i seont d' tous les fiêtes communales : concert du Verdi Saint au marché aux fleurs, concert d'ouverture de l' karmesse in sétimpe, Processieon, plus d'éautes prestatieons, par eximpe quand i-a eine visite royale à Tournai.
Milliard, qu'i-in a qui foutent l' barpe à v'nir sonner à les portes ! Mi, j' sreos bourguémette, j' f'reos interdire tout cha. Surtout qu'i n' d'a qui profit'tent pour agoner les gins, qui leu feont croire tous des mintiries, qui vol'tent les viellés gins, ou bin qui vous vind'tent tous des salop'ries : des vielles loques, des contrats d'élestrique ou tous des affaires ainsin. I n' d'a même qui s' feont passer pou des des feaux policiers. Et qui mettent des feausses perruques et des vraies moustaches pou faire pus vrai. Mi, j' n'ouvère em' porte que quand j' sais pour quoi. Par eximpe, j'ouvère pou l'opératieon arc-en-ciel : i ramass'tent de l' norriture pour les malhureux. Et on a toudis ein boîte de conserfe qu'on n'utilisse pos dins s' cafe.
Mi j' sus d' nature optimisse, acor hureux pasque si t' veux t' délaminter, t'acoutes les informatieons à l' télé ou bin te lis l' gazette et là, si t' veux t'in faire, t'as l'imbaras du choix. Guerres, attintats, accidints, incendies par chi, agressieons par là et j'in passe. Si t' prinds tout à cœur, t'n'as foque tes deux is pour braire. Ch'est aussi pour pour cha que nous z'eautes au Cabaret Wallon, après eine prestatieon, on est fin bénaisses si on a pu donner ein p'tit queop d' bonheur à les gins.
Bonjour, savez, mes gins. Vous qui suivez eine milette l' Cabaret Walleon, vous savez qu'on aime bin d' faire plaisir à ses amisses. Chaque feos qu'on n' d'a l'occasieon, on n'hésite pos à meonter su l' ponteon pou canter eine paire de cancheonnettes pour autant qu' les bénéfices i serf'tent à eine séquoi. Et pos pou que l'z'organisteurs i s'in veont après minger su no queompte ! N' faudreot pos exagérer tout n' même ! Tout cha pou vous dire qu'après avoir été canter pou les scouts ed' Kain, asteur ch'est pou les ceusses d' Froyennes qu'on va meonter su l' ponteon. Et les bénéfices i servireont à acater du matériel pour l' camp qu'i feont chaque ainnée au début des grantes vacances.
Ainsin, sans faire de bruit, comme ch'éteot t'n'habitute, t' nous as quittés i-a eine paire de jours. T'éteos au Cabaret d'puis 1977, cha fait 40 ans. Su l' ponteon, t'as écrit des cancheons qui montrent bin l'ampleur de t' talent. Même qu'in puque, t'écriveos alfeos l' musique ti-même. T'as cotoyé 43 compagneons différints, t'as connu quate présidint sans queompter qu't'es né l' même jour que l' Cabaret... dix-huit après quand même. T'as même connu Walter Ravez ! On peut dire sans s' tromper qu' t'éteos eine figure tournaisienne. Et même si t' faiseos tout au puque ein mète septante, t'éteos ein grand heomme par t' talent, t' grand coeur et l'amour profond qu' t'aveos des gins.
Mi j' n'y conneos pos grand queosse in écolomie mais quanç'que j' veos l' nombre d' repas qu'i feont à l' maseon du Pichou pour que des gins i-eont eine séquoi à minger, mi je m' dis que l' dualité inter les nantis et les eautes ch'est d' pire in pire. L'Europe, ch'est surtout l'europe des liards. El' prouèfe, quanç'qu' on y parle du social, et cha n'arrife pos souvint, ch'est des orcommindatieons et quanç'qu'i sort eine séquoi d'antisocial, là ch'est des directifes.
Ch'est dit, ch'est fait : au prumier d' janvier 2018, on n' frappera pus no monnaie in Belgique. On n' parle pos de l' planque à billets, mais du bucache des pièches. Beon, ch'est vrai que l' mitralle d'ein obin deux chintimes cha fait pus d' treos dins tes tasses que cha rind riche t' porte-monnaie. Cha permet acore au bouticlier de t' rinte fièremint ein chintime quand te li deonnes 10 euros pou eine séquoi qui in coûte 9,99. Ch'est tout l' même ein drole de carcul si on fait les queomptes. I paraît que l' fabricatieon d'eine pièche de deux euros cha coûte 20 chintimes, ceulle d'ein euro 15 chintimes, mais qu' les pièches d'ein et deux chintimes cha in coûte treos. L'ein dins l'eaute, l'État i-est pourtant gangnant. Mais v'là, on va faire fabriquer nos pièches dins ein eaute pays d'Europe et mette 25 ouverriers belges à l' tique. Et cha, ch' n'est pos dins l' déqueompte.
I-a eine paire de s'maines, début octope, j'ai été in vacances in Espanne, au sud, in Indalousie. Misère, qu'i f'seot quéaud ! Pus d' trinte degrés l'après-deîner ! Ein queop qu' j'aveos dit à mes amisses que j'éteos avec : « Milliard ! Qué caleur ! », i-a eine Espanole qui s'a ortournée et qui m'a répondu « Si Senor, Qué calore ! » Et pos b'souin d' couverte ni d' pyjama pou dormir de l' nuite. J'aveos bin pris eine mareonne et ein pull, mais cha j' les ai mis jusse pou l'ortour pasque débarqué d' l'avieon à Charleroi, l' timpérature elle aveot drôl'mint cangé. L'Indalousie, ch't'eine régieon dùsque les Arapes i seont arrivés peu après les ainnées siept chints, s'qu'au treizième sièque. I z'eont laiché eine masse de constructieons ; rien qu' les rues intorténées dins les villes et villaches, ch'est ç' qu'i-a d' pus typique. A l'époque, des mosquées, des églisses ou cathédrales et des synagoques i-éteotent côte à côte et cha n' déringeot perseonne. J' pinse qu'aujord'hui on pourreot s'in inspirer d' timps in temps. Les Arapes i-éteotent in ç' temps-là des gins qui respecteotent tout l' meonte.
J'ai li que l' dernière fabrique à magnétoscopes i-aveot arrêté s' productieon. Ch'éteot eine saprée mervelleusse invintieon. Ch'éteot fait pou la paix des ménaches. Quand i-aveot ein mache d' fotballe et que Madame vouleot in même temps vir « Les feux d' l'amour » obin eine séquoi ainsin, l' cat i-areot pu ête dins l'horloche. Mais neon, l' magnétoscope i-orpéqueot l'affaire et i-éviteot l' bisbroule. L'heomme i diseot : « Cha n' fait rien, m' chérie, mets l' caîne que t' veux. J' vas inregistrer l' mache. In attindant, j' vas aller faire ein p'tit tour, puis j'orvén'rai l'orwettier à m'n aisse. » Beon, i n' li diseot pos qu'i-alleot ortrouver ses amisses dins ein bistreot dusqu'i-aveot l' mache à l' télévisieon. Et elle, même si elle s'in douteot, elle ne faiseot pos gnien-gnien vu qu'elle aveot ç' qu'elle vouleot. Quand l'heomme i rintreot avé s' panche plein d' bière, l' feimme i-aveot d'jà mis ses bigoudis et ses crèmes de nuite et i-aveot parti à s' lit. L'heomme i s' installeot dins l' fauteul, i-alleumeot l' télévisieon, i metteot l' cassette dins l' magnétoscope comme pou faire simblant et i ronfiéleot après cheonq minutes.
Mi, j'sus comme bramint d'heommes, normal'mint ch'est mi qui commante mais ch'est m' feimme qui décite d' tout. Comme i-a bramint d' restos qui seont freumés pindant les congés, elle aveot décidé qu'on alleot minger au restaurant chinois. À l'intérieur, ch'éteot fin bieau et l' pétite chinoisse qui nous a accueullis même si elle n'éteot pus toute jeone, elle éteot cor bin jolie et avec des bieaux restants comme on dit.
Banjour mes gins, m' mopère i diseot toudis : « Garcheon, intre busier et apinser, i-a eine freontière, ch'est pos l' même meonte. Busier, cha tertous i sait l' faire mais apinser ... Pou certains, ch't'ein deon, ein sixième sins. Pou d'z'éautes, ch'est eine scieince qu'on apprind in f'sant des héautes étutes. Mais i d'a qui sortent ed' là diplômés et qui seont toudis aussi annochints ! » I n' pinseot pos si bin dire... L'éaute jour, m' Gertrute aveot rêvé d' tout canger l' cuisine et d' mette l'évier pa d'zous l' ferniète deonnant eine belle vue su l' gardin pindant l' vaisselle. Même qu'elle aveot fait ein plan. « Très joli, que j' li dis, mais quoisqu'on fait pou l'arrivée d'iéau ? Et pou l' vidanche ? On fait saut'ler l' nouvieau carr'lache ? » L' plan i-a fini à l' poubelle et j'ai cait dins l' meonte du silinche pou l' restant de l' journée. Ch' n'éteot qu'ein eximpe.
Des travéaux au chintre ville, cha existe ? Bé tins au Becquerelle et au Peont d' Fier d'puis d'jà eine paire d' meos et acore sans doute pour bramint d' meos, si pos d'ainnées ! Et même in déhors du chintre ville, au Faurbout Saint-Martin. Nos édiles, v'là qu'i s'eont rindu queompte qu'on alleot ouvère ein nouvieau hôpital su l' terrain d' l'Unieon et qu'i falleot faire eine séquoi pou l' mobilité et l' parkinne. L' temps qu'i décitent et qu' les travéaux i comminch'tent – cha fait seûr'mint d'jà deux ans – l'hôpital i s'a ouvert mais Armand Boite i n'a pos fini d'ouvrer... J' vous dis pos queu dallache pour orjointe l' nouvieau hôpital ! D'jà qu'i-a follu presque dix ans pou tous les travéaux du chintre ville, jusse l' temps pou tous les commerçants de d'salter. Quand te veos l' résultat, bé i faudreot donner une boutèle de sidol à tous les habitants et les quéques commerçants qu'i reste, pour eusses faire blinquer l' fil d'or, qui n'a d'or que l' neom qu' l'architèque Mich'lin i-a osu inventer pour ein bout d' ferralle qu'on n' réussit pos à faire ténir inter les pavés irlandais.
Pou ceulle rubrique d'aujourd'hui, j' voudreos ichi parler de nos visins d' Wallonie Picarte, nos amisses d'Ath. J'ai eu l' sanche inestimape d'ête là pou l' saim'di de l' ducasse. Mo Dieu queulle affaire ! J'in sus acore tout plein d' bénaiss'té même puque, j' d'ai acore m' cœur mansé d'émotieon et les is tout pleins d'imaches, les orelles plein d' musiques qui s' bouscul'tent dins m' tiête. Pasque les géants i seont fin bieaux et i seont là pou rapp'ler des fameusses traditieons de l' chité des géants, in mélingeant les épisotes d'histoire religieusse et des eautes histoires profanes, l' bourguémette et l' doyen insanne, tout ein symbole.
L' wékenne prochain, ch't'ein wékenne d' réjouissances à Tournai. Deux traditieons bin ancrées dins l' cité, l' pus incienne l' Grante Processieon et l'éaute ein queop pus nouvelle Les cortèches de géants. Deux z'héros des festivités tournaisiennes in quéque sorte. Et tout l' même jour. Cha ch't'eine prumière ! Même si i-a eu ein essai l'an passé mais qu'à causse de l' plouèfe, pou les cortèches de géants, cha a foiré. J'in conneos qui veont d'voir avaler ein sandwich in deux temps treos mouv'mints après l'apéro post processieon avant d'orjointe les cortèches.
Bonjour, savez, mes gins. Je n'sais pos si vous avez d'jà vu l' façate du nouvieau Conservatoire ? Ou puteôt l' nouvelle façate du Conservatoire... Ch'est bieau hein ? Tout in blanc comme cha, cha deonne bin. Et no Maïeur impêché i-a l'air fin bénaisse du résultat. Feaut vir comme i moute les photeos à tertous ! Ah cha i-est vraimint contint. Mais comme elle répète toudis Solanche, eine de mes viseines, pou l' politique, l' façate ch'est important ! Surtout à l's électieons... ch'est cha qui ramène des veox ! Et in puque, z'avez vu les glaches qu'i-a là ? Je m' deminte bin si ch'est les ouverriers de l' Ville qui veont les nettier ? In attindant, j' plains hardimint les malhureux qui veont d'voir faire l'ouvrache. Et l' temps qu'i faudra. Quand ç'que t'aras fini d'ein côté, t' pourras orcommincher d'l'éaute.
Bé vingt milliards, i m'in arrife toudis des dreôles, savez ! A l' fin du meos d' juillet, ov'là qu'ein soir, ej' m'orlèfe dins m'lit pour attraper l' drap, et je n' sais pos commint qu' cha s'a fait, mais tout d'ein queop j'ai intindu "Crac" dins m' guénou. Hasard que m' pied i deot avoir pris dins l' couverte. N'allez pos imaginer éaute queosse, ch'est l' vérité vraie... D'ailleurs, j' n'ai pus vu ein heomme dins m' lit d'puis au moins trinte ans. Du lind'main, comme cha f'seot bin mau, j' vas vir el' docteur, qui m' fait directemint aller à les urginces. Là, ch'est l' début du parcours du combattant ! On m' fait eine radieo... Tertous i sait bin qu'eine radieo du gu'nou, cha n' sert à rien... Tout cha pou dire qu'i n'a rien à mes oches. Bé cha je l' saveos bin, aussineon j' n'areos pu su marcher !
Banjour mes gins, infin nous ov'là au meos d'août avec el' beonne nouvelle qu' les soldes i-seont... outes ! Fini d' faire des rallyes dins tout l' ville et à l'intours, pourménant « Madame » qui cache toudis à les beonnes affaires. Pasque, vu qu'elle n'a pos d' permis, ch'est Bibi qui fait « Jo le Taxi » et qui va tout partout et cha, deux meos par an, tout in f'sant sûr ein après-deîner autant d'étapes qu'i-a au Tour de France. In puque ed'cha, m' Gertrute n' fait jamais dins l' tir groupé savez, ein queop ch'est pour eine rope, après ch'est pour ein nouvieau sa et l' pire, ch'est pou des sorlets qui doif'tent suife avé l' robe aquatée de l' velle ! L' tournée finie, j' rinte démoli de m' deos rien qu' d'avoir meonter et déquindu de m' carette.
In été, ch'est l' momint des festivals de tous les sortes. Ouais, j'écris bin festivals et pos festivaux. Ch'est eine bleusse de l' grammaire française. J' suppose qu'on va acor béteôt ruer ces esseptieons à l'oule, comme l's accints circonflesques. Tout cha pou vous dire qu' j'ai été acouter ein canteu dins ein festival. J'ai d'jà oblié s' neom. Ch'est mes amisses à l'ouvrache qu'i m'aveotent offère l' plache pou m' départ à l'ortraite. I n'aveotent pos d'idée d' cadéau. Ch'éteot cha obin eine crowate ou des bertielles.
Je n' tappelle pos Willie, pasque t' manman elle n'aimeot pos cha. Et j' veux ichi t' dire merci pour tout ç' que t'as fait pou no n'équipe de fotbal belche. Quand te l'as orpris i-a d' cha quatre ans, l'équipe elle éteot bin leon dins l' class'mint mondial. La Belgique elle n'aveot pus été à eine coupe du meonte ou ein eureo depuis 2002. Grâce à ti, et à les jeueus bin seûr, on a été in quart de finale à l' coupe du meonte, et ichi à l'eureo. Je n' parle même pos du class'mint mondial... ch'est vrai qu' ch'est pos cha l' pus important.
Je n' sais pos si vous l' savez, mais si vous l' savez, je n' vas pos vous l'apprinte : les politiciens i n'eont pos toudis du beon sens. L' dernier eximpe i vient d' caire, avé l' limitatieon des luméreos inami pou les étudiants in médecine. Ainsin, les étudiants in prumière ainnée, i vienn'tent d' finir leus examens "normaux", et qu'i soich'tent réussis ou bin pos, i doif'tent passer ein "concours" pou savoir qui ç' que ch'est qui pourra ête méd'cin pus tard. Adeon, les ceus qui z'eont réussi tous leus examens, on va pétête leu dire que leu n'ainnée d'étutes elle n'a servi à rien. Si j'ai bin compris, pasqu'alfeos, j' sus pos trop fute-fute.
|
3 mai 2017 par Anar